తిరుమలలో భక్తుల రద్దీ భారీగా పెరిగింది.. శ్రీవారి దర్శనానికి 30 గంటల నిరీక్షణ.. టీటీడీ కీలక సూచనలు

తిరుమలలో భక్తుల రద్దీ రోజురోజుకు భారీగా పెరుగుతోంది. శ్రీవారి దర్శనం కోసం దేశం నలుమూలల నుంచి భక్తులు పెద్ద ఎత్తున తరలివస్తుండటంతో తిరుమల అంతా కిటకిటలాడుతోంది. అలిపిరి టోల్ గేట్ నుంచే భారీ రద్దీ కనిపిస్తుండగా, వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు పూర్తిగా నిండిపోయాయి.

భక్తుల రద్దీ కారణంగా క్యూ లైన్లు గోగర్భం డ్యామ్ వరకు విస్తరించాయి. సర్వదర్శనం కోసం టోకెన్లు లేకుండా క్యూ లైన్‌లో ప్రవేశించే భక్తులకు శ్రీవారి దర్శనం పొందడానికి 24 గంటల నుంచి 30 గంటల వరకు సమయం పడుతోందని తిరుమల తిరుపతి దేవస్థానం అధికారులు వెల్లడించారు.

టైమ్ స్లాట్ దర్శనం టోకెన్లు కలిగిన భక్తులకు దర్శనం కోసం సుమారు 6 నుంచి 7 గంటల సమయం పడుతుండగా, శీఘ్ర దర్శనం టోకెన్లు ఉన్న వారికి 4 నుంచి 5 గంటల సమయంలో దర్శనం కలుగుతోందని అధికారులు తెలిపారు.

నిన్న ఒక్కరోజే తిరుమల శ్రీవారిని 86,315 మంది భక్తులు దర్శించుకున్నారు. వీరిలో 44,107 మంది భక్తులు తమ తలనీలాలను సమర్పించారు. అలాగే శ్రీవారి హుండీ ఆదాయం రూ.3.94 కోట్లుగా నమోదైందని టీటీడీ అధికారులు వెల్లడించారు.

గత రెండు రోజులుగా దాదాపు 70 వేల మంది భక్తులు కాలినడకన తిరుమలకు చేరుకుని తమ మొక్కులు చెల్లించుకుంటున్నారు. పెరుగుతున్న రద్దీని దృష్టిలో ఉంచుకుని టీటీడీ అధికారులు ప్రత్యేక చర్యలు చేపడుతున్నారు. క్యూ లైన్ మేనేజ్‌మెంట్ సిస్టమ్ ద్వారా సాధారణ భక్తులకు ప్రాధాన్యత కల్పిస్తూ దర్శన ఏర్పాట్లు చేస్తున్నారు.

కమాండ్ కంట్రోల్ సెంటర్ ద్వారా తిరుమలలోని క్యూ లైన్ల పరిస్థితిని నిరంతరం పర్యవేక్షిస్తున్నారు. దర్శనం కోసం వేచి ఉన్న భక్తులకు శ్రీవారి సేవకులు అన్నప్రసాదం, మజ్జిగ, మంచినీరు, పాలు పంపిణీ చేస్తున్నారు.

ఇదే సమయంలో టీటీడీ భక్తులకు కీలక సూచనలు చేసింది. సర్వదర్శనానికి 24 గంటలకు పైగా సమయం పడుతున్నందున భక్తులు పూర్తి సహనంతో వ్యవహరించాలని, టీటీడీ సిబ్బందికి సహకరించాలని కోరింది. దర్శనం కోసం వచ్చే భక్తులు ముందస్తు ప్రణాళికతో రావాలని అధికారులు సూచిస్తున్నారు.

తిరుమలలో పెరుగుతున్న భక్తుల రద్దీ నేపథ్యంలో ఉన్నతాధికారులు దర్శనం క్యూ లైన్ల నిర్వహణను స్వయంగా పర్యవేక్షిస్తున్నారు.