సింహవాహనంపై సుదర్శన నరసింహుడిగా కల్యాణ వేంకటేశ్వరస్వామి దర్శనం..

నారాయణవనంలోని శ్రీ పద్మావతి సమేత శ్రీ కల్యాణ వేంకటేశ్వరస్వామివారి వార్షిక బ్రహ్మోత్సవాలు భక్తి శ్రద్ధల మధ్య వైభవంగా కొనసాగుతున్నాయి. ఉత్సవాల్లో మూడో రోజైన శనివారం ఉదయం స్వామివారు సింహవాహనంపై సుదర్శన నరసింహుడి అలంకారంలో భక్తులకు దివ్య దర్శనమిచ్చి అనుగ్రహించారు.

బ్రహ్మోత్సవాల్లో భాగంగా నిర్వహించిన ఈ విశిష్ట వాహనసేవలో శ్రీనివాసుడు అనంత తేజోమూర్తిగా సింహవాహనాన్ని అధిరోహించి దుష్టశిక్షణ, శిష్టరక్షణ అనే సనాతన ధర్మ సందేశాన్ని భక్తులకు అందించారు. పరాక్రమం, ధైర్యం, శక్తి, తేజస్సుకు ప్రతీకగా భావించే సింహరూప దర్శనం భక్తులను విశేషంగా ఆకట్టుకుంది.

ఉదయం ప్రారంభమైన వాహనసేవలో భక్త బృందాలు చెక్కభజనలు, కోలాటాలు, గోవింద నామస్మరణలతో ఆధ్యాత్మిక వాతావరణాన్ని సృష్టించాయి. మంగళవాయిద్యాల నడుమ స్వామివారి ఊరేగింపు అత్యంత వైభవంగా సాగింది. ఆలయ వీధుల్లో పెద్ద సంఖ్యలో తరలివచ్చిన భక్తులు కర్పూర హారతులు సమర్పిస్తూ స్వామివారిని దర్శించుకున్నారు.

ఆధ్యాత్మిక గ్రంథాల ప్రకారం సింహవాహనం ధర్మవిజయానికి, దుష్టశక్తుల నిర్మూలనకు ప్రతీకగా భావించబడుతుంది. నరసింహ స్వరూపంలో దర్శనమిచ్చే విష్ణుమూర్తి భక్తులకు భయాన్ని తొలగించి ధైర్యం, ఆత్మవిశ్వాసం ప్రసాదిస్తాడని విశ్వాసం. ఈ వాహనసేవ ద్వారా అజ్ఞానాన్ని తొలగించి సత్యం, ధర్మం మార్గంలో నడవాలని స్వామివారు సందేశం ఇచ్చారని భక్తులు భావిస్తున్నారు.

బ్రహ్మోత్సవాల్లో ప్రతి రోజు నిర్వహించే వాహనసేవలు ప్రత్యేక ఆధ్యాత్మిక ప్రాధాన్యం కలిగి ఉంటాయి. సింహవాహన సేవను తిలకించిన భక్తులు తమ జీవితాల్లో విజయం, శాంతి, ధైర్యం కలగాలని ప్రార్థించారు.

బ్రహ్మోత్సవాల తదుపరి కార్యక్రమాల్లో భాగంగా శనివారం రాత్రి 7 గంటలకు ముత్యపుపందిరి వాహనంపై శ్రీ కల్యాణ వేంకటేశ్వరస్వామివారు భక్తులకు దర్శనమివ్వనున్నారు. ఈ సేవను వీక్షించేందుకు భారీ సంఖ్యలో భక్తులు తరలిరానున్నారు.

ఈ కార్యక్రమంలో ఆలయ డిప్యూటీ ఈవో శ్రీమతి నాగరత్న, సూపరింటెండెంట్ శ్రీ శ్రీనివాసులు రెడ్డి, టెంపుల్ ఇన్‌స్పెక్టర్ శ్రీ నాగరాజు, ఆలయ అధికారులు, అర్చకులు మరియు విశేష సంఖ్యలో భక్తులు పాల్గొన్నారు.