ధ్వజారోహణంతో ప్రారంభమైన నారాయణవనం బ్రహ్మోత్సవాలు.. కల్యాణ వేంకటేశ్వరస్వామి ఆలయంలో ఆధ్యాత్మిక వైభవం

తిరుపతి జిల్లా నారాయణవనంలోని శ్రీ పద్మావతి సమేత శ్రీ కల్యాణ వేంకటేశ్వరస్వామివారి వార్షిక బ్రహ్మోత్సవాలు గురువారం ఘనంగా ప్రారంభమయ్యాయి. ధ్వజారోహణ మహోత్సవంతో ప్రారంభమైన ఈ ఆధ్యాత్మిక ఉత్సవాలు జూన్ 5వ తేదీ వరకు భక్తిశ్రద్ధలతో కొనసాగనున్నాయి. వేలాది మంది భక్తుల గోవింద నామస్మరణల నడుమ ఆలయ ప్రాంగణం భక్తి పారవశ్యంతో కళకళలాడింది.

ఉదయం 7.30 గంటల నుంచి 9 గంటల మధ్య శుభ మిధున లగ్నంలో వైఖానసాగమ సంప్రదాయం ప్రకారం ధ్వజారోహణ కార్యక్రమాన్ని అర్చకులు శాస్త్రోక్తంగా నిర్వహించారు. బ్రహ్మోత్సవాలకు సకల దేవతలను ఆహ్వానిస్తూ గరుడ చిహ్నంతో కూడిన ధ్వజపటాన్ని ధ్వజస్తంభంపై ప్రతిష్ఠించారు. ఈ సందర్భంగా భేరితాడనం, విశేష పూజలు, ఆస్థానం వంటి కైంకర్యాలు నిర్వహించగా భక్తులు భక్తిశ్రద్ధలతో పాల్గొన్నారు.

ధ్వజారోహణ అనంతరం ఉదయం 10 గంటల నుంచి 11 గంటల వరకు స్వామివారు, అమ్మవార్లకు స్నపన తిరుమంజనం వైభవంగా నిర్వహించారు. పాలు, పెరుగు, తేనె, చందనం, పసుపు, పండ్ల రసాలతో అభిషేకాలు చేసి ప్రత్యేక పూజలు సమర్పించారు. వేదమంత్రోచ్చారణల నడుమ జరిగిన ఈ కార్యక్రమం భక్తులను ఆధ్యాత్మికానందంలో ముంచెత్తింది.

సాయంత్రం నిర్వహించిన ఊంజల్ సేవ భక్తులను ఆకట్టుకోగా, రాత్రి 7 గంటల నుంచి 9 గంటల వరకు పెద్దశేష వాహనసేవ అత్యంత వైభవంగా జరగనుంది. బ్రహ్మోత్సవాల సందర్భంగా ప్రతిరోజూ ఉదయం, రాత్రి వివిధ వాహనాలపై స్వామివారు భక్తులకు దర్శనమివ్వనున్నారు.

బ్రహ్మోత్సవాల్లో భాగంగా మే 29న చిన్నశేష, హంస వాహనాలు, మే 30న సింహ, ముత్యపుపందిరి వాహనాలు, మే 31న కల్పవృక్ష, సర్వభూపాల వాహనాలు నిర్వహించనున్నారు. జూన్ 1న మోహినీ అవతారం, గరుడవాహన సేవలు విశేష ఆకర్షణగా నిలవనున్నాయి. జూన్ 2న హనుమంత, గజ వాహనాలు, జూన్ 3న సూర్యప్రభ, చంద్రప్రభ వాహన సేవలు జరగనున్నాయి.

అత్యంత వైభవంగా నిర్వహించే రథోత్సవం, అశ్వవాహన సేవ, శ్రీ స్వామివారి కల్యాణోత్సవం జూన్ 4న జరుగనున్నాయి. ముఖ్యంగా రాత్రి 8.30 గంటలకు నిర్వహించే కల్యాణోత్సవానికి భారీ సంఖ్యలో భక్తులు హాజరుకానున్నారు. జూన్ 5న చక్రస్నానం, ధ్వజావరోహణంతో బ్రహ్మోత్సవాలు ముగియనున్నాయి.

భక్తులకు ఎలాంటి అసౌకర్యం కలగకుండా దర్శనం, ప్రసాదాల పంపిణీ, తాగునీరు, పారిశుద్ధ్యం, భద్రత తదితర అంశాల్లో టీటీడీ ప్రత్యేక ఏర్పాట్లు చేపట్టింది.