RG Kar కేసులో కీలక మలుపు.. ఆధారాల ధ్వంసంపై CBI-SIT విచారణకు Calcutta HC ఆదేశాలు

దేశవ్యాప్తంగా సంచలనం సృష్టించిన RG Kar Medical College ట్రైనీ డాక్టర్ అత్యాచారం, హత్య కేసులో కీలక పరిణామం చోటుచేసుకుంది. ఈ కేసులో ఆధారాల ధ్వంసం, ఘటనను కప్పిపుచ్చే ప్రయత్నాలపై ప్రత్యేక దర్యాప్తు చేపట్టాలని Calcutta High Court ఆదేశించింది. ఇందుకోసం మూడు సభ్యులతో కూడిన ప్రత్యేక CBI-SIT బృందాన్ని ఏర్పాటు చేయాలని కోర్టు స్పష్టం చేసింది.

Justice Shampa Sarkar, Justice Tirthankar Ghoshల ధర్మాసనం ఈ ఆదేశాలు జారీ చేసింది. CBI Joint Director (East) నేతృత్వంలో SIT పని చేయనుండగా, మిగిలిన ఇద్దరు సభ్యులను 48 గంటల్లో నియమించాలని కోర్టు పేర్కొంది.

2024 ఆగస్టు 9 రాత్రి RG Kar Medical College and Hospitalలో ట్రైనీ డాక్టర్‌పై అత్యాచారం చేసి హత్య చేసిన ఘటన దేశవ్యాప్తంగా తీవ్ర ఆగ్రహానికి దారితీసింది. ఈ ఘటన తర్వాత ఆధారాలను నాశనం చేశారనే ఆరోపణలు, కేసును కప్పిపుచ్చే ప్రయత్నాలు జరిగాయనే అనుమానాలు వ్యక్తమయ్యాయి. దీంతో బాధితురాలి తల్లిదండ్రులు మరింత లోతైన దర్యాప్తు కోరుతూ హైకోర్టును ఆశ్రయించారు.

ఈ కేసులో ఇప్పటికే civic volunteer Sanjay Royకు జీవిత ఖైదు విధించబడింది. అయితే ఈ హత్యలో ఒక్కరే కాక మరికొందరి పాత్ర కూడా ఉండొచ్చని బాధితురాలి కుటుంబం ఆరోపిస్తోంది. ఈ నేపథ్యంలో ఘటన జరిగిన రాత్రి బాధితురాలు భోజనం చేసిన సమయం నుంచి అంత్యక్రియలు పూర్తయ్యే వరకు జరిగిన ప్రతి పరిణామాన్ని SIT పరిశీలించాలని కోర్టు ఆదేశించింది.

ఇటీవల ఈ కేసులో మరిన్ని కీలక పరిణామాలు చోటుచేసుకున్నాయి. పలు బెంచ్‌లు విచారణ నుంచి తప్పుకోవడం, మాజీ పోలీస్ అధికారుల సస్పెన్షన్, ఆధారాలపై అనుమానాలు వంటి అంశాలు కేసును మరింత సున్నితంగా మార్చాయి. దీంతో పూర్తి స్థాయి నిజాలు వెలుగులోకి రావాలనే డిమాండ్ మరింత పెరుగుతోంది.

కోర్టు తాజా ఆదేశాలతో కేసులో కొత్త మలుపు తిరిగిందని న్యాయ వర్గాలు భావిస్తున్నాయి. SIT దర్యాప్తు ద్వారా అసలు నిజాలు బయటపడతాయా అనే ఆసక్తి దేశవ్యాప్తంగా నెలకొంది.