మత్తు పదార్థాలపై తిరుపతి పోలీసుల ఉక్కుపాదం.. ప్రత్యేక టెస్టులు, కౌన్సిలింగ్ కార్యక్రమాలు
తిరుపతి జిల్లా వ్యాప్తంగా మత్తు పదార్థాల నిర్మూలనకు పోలీసులు ప్రత్యేక చర్యలు చేపడుతున్నారు. యువతను గంజా, ఇతర మత్తు పదార్థాల బారిన పడకుండా కాపాడడం, సమాజంలో ఆరోగ్యకరమైన వాతావరణం నెలకొల్పడం లక్ష్యంగా విస్తృత స్థాయిలో అవగాహన కార్యక్రమాలు నిర్వహిస్తున్నారు.
తిరుపతి జిల్లా ఎస్పీ శ్రీ ఎల్. సుబ్బరాయుడు, ఐపీఎస్ గారి ఆదేశాల మేరకు జిల్లా వ్యాప్తంగా డ్రగ్స్ వ్యతిరేక చర్యలు మరింత ముమ్మరం చేశారు. ఇందులో భాగంగా శ్రీకాళహస్తి డీఎస్పీ ఆధ్వర్యంలో బి.ఎన్. కండ్రిగ పోలీస్ స్టేషన్ పరిధిలో మత్తు పదార్థాల వినియోగదారులకు ప్రత్యేక కౌన్సిలింగ్ కార్యక్రమం నిర్వహించారు.
ఈ సందర్భంగా ప్రత్యేక టెస్టింగ్ కిట్ల ద్వారా అనుమానితులకు పరీక్షలు నిర్వహించి మత్తు పదార్థాల వినియోగం వల్ల కలిగే తీవ్ర దుష్పరిణామాలపై అవగాహన కల్పించారు. మత్తు పదార్థాల వాడకం వల్ల శారీరక, మానసిక ఆరోగ్య సమస్యలతో పాటు కుటుంబ సంబంధాలు కూడా దెబ్బతింటాయని అధికారులు వివరించారు.
అలాగే గంజా మరియు ఇతర మత్తు పదార్థాల అలవాటు వ్యక్తిగత జీవితానికే కాకుండా సమాజ శాంతిభద్రతలకు కూడా ముప్పుగా మారుతుందని పోలీసులు హెచ్చరించారు. యువత చెడు అలవాట్లకు దూరంగా ఉండి విద్య, ఉపాధి, భవిష్యత్తుపై దృష్టి పెట్టాలని సూచించారు.
మత్తు పదార్థాల విక్రయాలు, రవాణా, వినియోగంపై జిల్లా వ్యాప్తంగా కఠిన చర్యలు కొనసాగుతాయని పోలీసులు స్పష్టం చేశారు. గంజా లేదా డ్రగ్స్కు సంబంధించిన సమాచారం తెలిసిన వెంటనే ప్రజలు పోలీసులకు తెలియజేయాలని కోరారు.
జిల్లాలో డ్రగ్స్ నిర్మూలనే ప్రధాన లక్ష్యంగా పోలీసులు నిరంతరం ప్రత్యేక డ్రైవ్లు, తనిఖీలు, అవగాహన కార్యక్రమాలు నిర్వహిస్తున్నట్లు అధికారులు తెలిపారు.
