బాలిక హత్య కేసుపై రాష్ట్రం ఆగ్రహంలో ఉండగా.. ప్రెస్‌మీట్‌కు ముందు నవ్విన పోలీసు అధికారులు.. వైరల్ వీడియోపై విమర్శలు

తమిళనాడులోని కోయంబత్తూరులో 10 ఏళ్ల బాలిక అపహరణ, అత్యాచారం, హత్య ఘటన రాష్ట్రవ్యాప్తంగా తీవ్ర ఆగ్రహాన్ని రేకెత్తిస్తోంది. ఈ విషాద ఘటనపై ప్రజలు తీవ్ర దిగ్భ్రాంతి వ్యక్తం చేస్తున్న సమయంలో, ఒక సీనియర్ పోలీసు అధికారి ప్రెస్‌మీట్‌కు ముందు నవ్వుతూ కనిపించిన వీడియో సోషల్ మీడియాలో వైరల్ కావడంతో వివాదం చెలరేగింది.

సూలూరులో జరిగిన ఈ ఘటనపై మీడియాతో మాట్లాడేందుకు ముందు పశ్చిమ జోన్ ఇన్‌స్పెక్టర్ జనరల్ ఆఫ్ పోలీస్ ఆర్.వి. రమ్య భారతి విలేకరులతో నవ్వుతూ, ముచ్చటిస్తూ కనిపించిన వీడియో ప్రస్తుతం సోషల్ మీడియాలో చర్చనీయాంశంగా మారింది.

సోషల్ మీడియాలో తీవ్ర విమర్శలు

సున్నితమైన కేసుపై రాష్ట్రవ్యాప్తంగా ఆవేదన వ్యక్తమవుతున్న సమయంలో అధికారుల ప్రవర్తనపై నెటిజన్లు తీవ్ర ఆగ్రహం వ్యక్తం చేస్తున్నారు.

“ఒక చిన్నారి దారుణ హత్యపై ప్రజలు విలపిస్తుంటే అధికారులు నవ్వుతూ కనిపించడం బాధాకరం” అంటూ పలువురు సోషల్ మీడియాలో స్పందిస్తున్నారు. ఈ వీడియో వైరల్ కావడంతో తమిళనాడు ప్రభుత్వంపై, అధికార యంత్రాంగంపై విమర్శలు వెల్లువెత్తుతున్నాయి.

మంత్రి వీడియో కూడా వివాదాస్పదం

ఇదే అంశంపై పరిశ్రమల శాఖ మంత్రి ఎస్. కీర్తన స్పందించిన వీడియో కూడా చర్చకు దారి తీసింది. ఆమె మీడియా ప్రశ్నలకు సమాధానం ఇస్తూ నవ్వుతూ కనిపించడంతో ప్రతిపక్షాలు విమర్శలు గుప్పించాయి.

బీజేపీ నాయకులు ఆమె వైఖరిని “నిర్లక్ష్యపూరితమైనది”గా అభివర్ణించారు. అయితే తన హావభావాలను రాజకీయంగా వక్రీకరిస్తున్నారని మంత్రి తర్వాత వివరణ ఇచ్చారు.

కేసులో ఇద్దరు అరెస్ట్

సూలూరు ఘటనపై తమిళనాడు వ్యాప్తంగా నిరసనలు కొనసాగుతున్నాయి. చిన్నారిపై జరిగిన దారుణానికి న్యాయం చేయాలని ప్రజలు డిమాండ్ చేస్తున్నారు.

ఈ కేసులో పోలీసులు ఇప్పటికే ఇద్దరు నిందితులను అరెస్టు చేసినట్లు తెలిపారు. ముఖ్యమంత్రి విజయ్ కూడా బాధిత కుటుంబానికి న్యాయం చేస్తామని హామీ ఇచ్చారు. అయినప్పటికీ ప్రజల్లో ఆగ్రహం ఇంకా కొనసాగుతోంది.