రిషికేశ్లో ఉజ్జయిని ఎక్స్ప్రెస్ బోగీలు పట్టాలు తప్పిన ఘటన.. తృటిలో తప్పిన భారీ ప్రమాదం
ఉత్తరాఖండ్లోని ప్రముఖ పుణ్యక్షేత్రం రిషికేశ్లో పెద్ద రైలు ప్రమాదం తృటిలో తప్పింది. యోగనగరి రైల్వే స్టేషన్ సమీపంలో ఉజ్జయిని ఎక్స్ప్రెస్కు చెందిన ఇంజన్తో పాటు కొన్ని బోగీలు షంటింగ్ పనుల సమయంలో పట్టాలు తప్పడంతో స్థానికంగా తీవ్ర కలకలం రేగింది.
సోమవారం రాత్రి జరిగిన ఈ ఘటనలో అదృష్టవశాత్తూ ఎలాంటి ప్రాణనష్టం జరగలేదు. మంగళవారం ప్రయాణానికి సిద్ధం చేయాల్సిన ఉజ్జయిని ఎక్స్ప్రెస్ రైలును రైల్వే యార్డ్ వైపు మార్చే క్రమంలో ఈ ప్రమాదం చోటుచేసుకుంది.
లోకో పైలట్ రైలును షంటింగ్ చేస్తుండగా ఖండ్ గ్రామం సమీపంలో రైలు ఒక్కసారిగా అదుపుతప్పింది. దీంతో ఇంజన్తో పాటు కొన్ని బోగీలు పట్టాలు తప్పాయి. ఈ క్రమంలో ఒక బోగీ వేగంగా వెళ్లి రైల్వే స్తంభాన్ని బలంగా ఢీకొట్టింది. ఢీకొట్టిన ధాటికి ఆ స్తంభం పూర్తిగా విరిగిపోయినట్లు అధికారులు తెలిపారు.
ప్రమాద సమయంలో భారీ శబ్దం రావడంతో సమీప గ్రామాల ప్రజలు భయాందోళనకు గురయ్యారు. ఏం జరిగిందో తెలుసుకునేందుకు పెద్ద సంఖ్యలో స్థానికులు ఘటనాస్థలానికి చేరుకున్నారు.
అయితే ఈ ఘటనలో ఊరటనిచ్చే విషయం ఏమిటంటే రైలు పూర్తిగా ఖాళీగా ఉండటం. కేవలం మెయింటెనెన్స్ పనుల కోసం మాత్రమే రైలును షంటింగ్ చేస్తుండటంతో అందులో ప్రయాణికులు ఎవరూ లేరు. ఒకవేళ ఇదే ప్రమాదం ప్రయాణికులతో నిండిన సమయంలో జరిగి ఉంటే భారీ ప్రాణనష్టం సంభవించే అవకాశం ఉండేదని అధికారులు భావిస్తున్నారు.
సమాచారం అందుకున్న వెంటనే స్థానిక పోలీసులు, జీఆర్పీ, ఆర్పీఎఫ్ సిబ్బంది ఘటనాస్థలానికి చేరుకుని సహాయక చర్యలు చేపట్టారు. సీనియర్ రైల్వే అధికారులు, ఇంజనీరింగ్ బృందాలు కూడా అక్కడికి చేరుకుని పరిస్థితిని సమీక్షించాయి.
జీఆర్పీ ఎస్పీ అరుణా భారతి మాట్లాడుతూ బ్రేక్ వ్యవస్థలో తలెత్తిన సాంకేతిక లోపం కారణంగా రైలు అదుపుతప్పి ఉండొచ్చని ప్రాథమికంగా అనుమానిస్తున్నట్లు తెలిపారు. లోకో పైలట్ నిర్లక్ష్యం కూడా కారణమై ఉండే అవకాశాన్ని కొట్టిపారేయలేమన్నారు. ఘటనపై పూర్తిస్థాయి విచారణకు ఆదేశించినట్లు వెల్లడించారు.
పట్టాలు తప్పిన ఇంజన్, బోగీలను తిరిగి ట్రాక్పైకి తీసుకురావడానికి సాంకేతిక బృందాలు రాత్రంతా శ్రమించాయి. దెబ్బతిన్న బోగీలను ప్రధాన రైలు నుంచి వేరు చేసినట్లు సీనియర్ కమర్షియల్ మేనేజర్ మహేష్ యాదవ్ తెలిపారు.
ఈ ప్రమాదం ప్రధాన ట్రాక్పై కాకుండా యార్డ్ సమీపంలోని ట్రాక్పై జరగడంతో ఇతర రైళ్ల రాకపోకలకు ఎలాంటి అంతరాయం కలగలేదని అధికారులు స్పష్టం చేశారు. రిషికేశ్కు వచ్చే అన్ని రైలు సర్వీసులు యథావిధిగా కొనసాగుతున్నట్లు తెలిపారు.
ప్రాణనష్టం జరగకపోయినా, రోజూ వేలాది మంది భక్తులు వచ్చే రిషికేశ్ వంటి కీలక ప్రాంతంలో ఇలాంటి ఘటన జరగడం రైల్వే భద్రతా వ్యవస్థలపై పలు ప్రశ్నలు లేవనెత్తుతోంది.
