తిరుపతి పోలీస్ శాఖలో పదవీ విరమణ పొందిన అధికారులకు ఘన సన్మానం.. సేవలను కొనియాడిన ఎస్పీ
తిరుపతి జిల్లా పోలీస్ శాఖలో సుదీర్ఘకాలం సేవలందించి పదవీ విరమణ పొందిన అధికారులు, సిబ్బందికి ఘనంగా వీడ్కోలు కార్యక్రమం నిర్వహించారు. పోలీస్ కార్యాలయంలో జరిగిన ఈ కార్యక్రమంలో వారి సేవలను గుర్తుచేసుకుంటూ ఉన్నతాధికారులు సన్మానించారు.
తిరుపతి జిల్లా ఎస్పీ శ్రీ ఎల్. సుబ్బరాయుడు ఐపీఎస్ ఆదేశాల మేరకు, అదనపు ఎస్పీ (పరిపాలన) శ్రీ వెంకటరావు ఆధ్వర్యంలో నిర్వహించిన ఈ కార్యక్రమం ఆత్మీయ వాతావరణంలో సాగింది. పదవీ విరమణ పొందిన పోలీసు సిబ్బందికి శాలువాలు కప్పి, జ్ఞాపికలు అందజేసి వారి సేవలను గుర్తు చేసుకున్నారు.
ఈ సందర్భంగా డీఎస్పీ కె.జె.ఎం. చిరంజీవి, ఏఎస్ఐలు ఎన్. సుధాకర్ చౌదరి, జి. సుధాకర్, కె. నారాయణ, జి. భాస్కర్ నాయుడు, జి. ఆనందుడు, జి. అశోక్ ఆనంద్ రాజ్ మరియు హెడ్ కానిస్టేబుల్ ఎస్. పరమేశ్వర రెడ్డిలను ప్రత్యేకంగా సత్కరించారు.
పోలీస్ శాఖకు విశేష సేవలు
ఈ సందర్భంగా జిల్లా ఎస్పీ శ్రీ ఎల్. సుబ్బరాయుడు మాట్లాడుతూ, పదవీ విరమణ ఉద్యోగ జీవితానికి ముగింపు అయినప్పటికీ సమాజానికి చేసిన సేవలకు అది శాశ్వత గుర్తింపని అన్నారు. పదవీ విరమణ పొందిన అధికారులు, సిబ్బంది తమ సేవా కాలంలో క్రమశిక్షణ, నిజాయితీ, అంకితభావంతో విధులు నిర్వహించి పోలీస్ శాఖకు మంచి పేరు తీసుకువచ్చారని కొనియాడారు.
ప్రజల భద్రత కోసం వారు అందించిన సేవలు ఎప్పటికీ గుర్తుండిపోతాయని, వారి అనుభవం భవిష్యత్ తరాల పోలీసు సిబ్బందికి మార్గదర్శకంగా నిలుస్తుందని పేర్కొన్నారు. పదవీ విరమణ అనంతరం కుటుంబ సభ్యులతో కలిసి ఆరోగ్యంగా, ఆనందంగా జీవించాలని ఆకాంక్షించారు.
శాఖ అభివృద్ధికి విశేష కృషి
అదనపు ఎస్పీ శ్రీ వెంకటరావు మాట్లాడుతూ, పదవీ విరమణ పొందిన అధికారులు, సిబ్బంది శాఖ అభివృద్ధికి చేసిన కృషి ప్రశంసనీయమని తెలిపారు. వారి సేవా కాలం యువ పోలీసులకు ఆదర్శంగా నిలుస్తుందని పేర్కొన్నారు. భవిష్యత్ జీవితంలో సుఖశాంతులు, ఆయురారోగ్యాలు కలగాలని ఆకాంక్షించారు.
ఈ కార్యక్రమంలో అదనపు ఎస్పీ (క్రైమ్స్) శ్రీ శ్రీనివాసులు, జిల్లా పోలీస్ అసోసియేషన్ ప్రతినిధులు, పోలీస్ సిబ్బంది, పదవీ విరమణ పొందిన అధికారులు మరియు వారి కుటుంబ సభ్యులు పాల్గొన్నారు.
